Poetik Qiraətdə bu dəfə İqbal Nəhmətdir. Şair “Yaddan çıxıb” deyə bir giley-guzar şeiri sərgiləyir.

Xoş mütaliələr!

Nəfsinə satılır bəşər övladı,

İnsan olan yerdə cin yaddan çıxıb.

Hərə bir məzhəbin qurbanı olub,

İman gedən yerdə din yaddan çıxıb.

Çoxu öldürübdü asıb haqqını,

Çoxunun yeyiblər susub haqqını,

Dartıb aparıblar kasıb haqqını, 

Milyonu deyirlər min yaddan çıxıb.

Həyat bir tamaşa izləyən yoxdu,

Mənəm-mən deyirlər biz deyən yoxdu,

Hamı düz yoldadı, düz gedən yoxdu,

Döngələr sahibsiz tin yaddan çıxıb.

Vallah belə fürsət heç düşməz ələ,

İqbal dəli olub danışır hələ,

Meşəmiz qırılıb ay tülkü lələ,

Qayıt bizim kəndə hin yaddan çıxıb?

Ədəbiyyat və incəsənət”

(31.05.2024)