“Ədəbiyyat və incəsənət” portalı Azərbaycan Yazıçılar Birliyinin üzvü Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Mətləb Ələsgərova həsr edilmiş şeirlə tanış olacaqsınız.

MƏTLƏB VÜQAR OĞLU ƏLƏSGƏROV

(18.07.1999.-07.10.2020.)

Ağstafa rayonunun Köçəsgər kəndindən olan, 2 nömrəli Köçəsgər kənd orta məktəbinin və Azərbaycan Dövlət Neft və Sənaye Universitetinin məzunu,  Qarabağın azad edilməsi uğrunda Vətən müharibəsinin şəhidi

Şəhid olduğu yer:  Füzuli rayonu

Dəfn yeri:  Ağstafa rayonu Köçəsgər kəndi

VURUŞDU GÖZ QIRPMADAN

Mətləb kimi igidlər azad etdi torpağı,

Onların qorxusundan it kimi qaçdı yağı.

Köçəsgərdə doğulub, göz açmışdı cahana,

Yayılıbdır şöhrəti indi Azərbaycana.

Məktəbdə oxuyanda hər il oldu əlaçı,

Anlayırdı, təhsildi çox dərdlərin əlacı.

Ali məktəbə girdi mühəndis olmaq üçün,

Neftçi kimi çalışıb səylə ucalmaq üçün,

Alim-müəllimlərdən öyrəndi yorulmadan,

Kamil olmaq olarmı, kitaba vurulmadan?

Bakalavr diplomunu qazandı zəhmət ilə,

Magistrliyə girdi yüksək bal-qiymət ilə.

Amma Vətən borcunu hər oğul verməlidir,

Əsgərlik məktəbini kişilər görməlidir.

Getdi hərbi xidmətə sevgiylə, məhəbbətlə,

Əsgərliyin edirdi ləyaqətlə, qeyrətlə.

Düşmən dinc dayanmayır verməliyik cavabın,

Otuz ildir çəkirik biz Qarabağ əzabın.

Müharibə başladı, igidlərim hazırdı,

Düşmən ağıllanmadı, hey yolunu azırdı.

Füzulinin uğrunda qanlı döyüş başlayıb,

Torpaqlar azad olur, hücum-yürüş başlayıb,

Mətləb necə qoçaqmış, alqışlar hünərinə,

Lap az qalıb xalqımın möhtəşəm zəfərinə.

Necə də xoşdur görmək torpaqların xilasın,

Mətləb ala bilmişdi əmisinin qisasın.

Əmisi də qəhrəman, cəsur, igid olmuşdu,

Vətənçin candan keçib, ölməz şəhid olmuşdu.

Mətləb son nəfəsədək vuruşdu, göz qırpmadan,

Şəhidliyə qovuşdu, belə yazmış yaradan.

Köçəsgərə qayıtdı bükülərək bayrağa,

Qovuşdu canından çox sevdiyi bu torpağa.

Ağstafa, Köçəsgər doğulduğu məkandır,

Əbədi məskənisə qalib Azərbaycandır.

“Ədəbiyyat və incəsənət”

(29.05.2024)