“Ədəbiyyat və incəsənət” portalı Azərbaycan Yazıçılar Birliyinin üzvü Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Ziyadxan Əliyevəhəsr edilmiş şeirlə tanış olacaqsınız.
ZİYADXAN İBRAHİM OĞLU ƏLİYEV
(12.01.1997.-30.09.2020.)
Əslən Cəbrayıl rayonunun Soltanlı kəndindən olan, Kürdəmir rayonunun Carlı kəndində dünyaya gələn, AzTU-nun məzunu, Azərbaycan Silahlı qüvvələrinin əsgəri, Qarabağ uğrunda Vətən müharibəsinin şəhidi.
ZİYADXAN
Qarabağ savaşında artıq qalib gəlmişik,
Millət kimi, xalq kimi zirvəyə yüksəlmişik.
Qələbəni qazanmaq asan gəlməyib başa,
Qətiyyətlə xalqımız atılıbdır savaşa.
Kim deyir ki, şəhidlər gözəl həyatdan doydu,
Qələbə yollarında igidlər canın qoydu.
İgidlərdən biridir cəsur, qorxmaz Ziyadaxan,
Qəhrəman ola bilməz qandan, ölümdən qorxan.
Bu həyat bir möcüzə, bu həyat bir nağıldı,
Əslən Cəbrayıldandı, Kürdəmirdə doğuldu.
Carlı kəndinin o, saf havasın udaraq,
Böyüdü, anladı ki, nədir yurd, nədir topaq.
Ailədə üç uşaqdan biri idi, Ziyadaxan,
Su kimi təmiz idi, duru idi, Ziyadxan.
Evlərində çox zaman söhbət Soltanlıdandı,
Cəbrayıldan, Şuşadan, ya da Mərcanlıdandı.
Doğmaların didərgin salmışsa da rüzgar,
Anası söyləyirdi gələcək nurlu bahar.
Biz yenə də qayıdıb gedəcəyik o yurda,
Düşməndən qisas alıb, dönəcəyik o yurda.
Ziydxan böyüyürdü, sevərək millətini,
İnanırdı xalqımız göstərər qüdrətini.
Çalışırdı inamla, çatmaq üçün məqsədə,
Vaxt gəldi, yüksək balla, girdi ali məktəbə.
Yaşamaq necə xoşdur, şərəf ilə qürurla,
İllər keçdi, məktəbi o, bitirdi uğurla.
Dedi ki, olmalıyam xalqıma layiq əsgər,
Oğullar vətən üçün doğulmamışlar məgər?
Ziyadaxan əsgərliyi az qalmış qurtarmağa,
Hücum əmri verildi - Torpağı qaytarmağa.
Necə də sevinirdi, nəhayət, çatdı məqam,
Vaxt yetişdi, düşməndən alınacaq intiqam.
Ziyadaxan cəsurluğun göstərdi savaşanda,
Kafirləri məhv etdi, öldüdü Suqovuşanda.
Talış döyüşlərində göstərdi o, rəşadət,
Qismətində var imiş o ucalıq, şəhadət.
Uyuyur Kürdəmirin “Şəhid Xiyabanı”nda,
Sevilir yurdumuzun Ziyadaxan hər yanında
“Ədəbiyyat və incəsənət”
(01.05.2024)
