“Ədəbiyyat və incəsənət” portalı Azərbaycan Yazıçılar Birliyinin üzvü Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Zaur Kərimovahəsr edilmiş şeirlə tanış olacaqsınız.

ZAUR SALEH OĞLU KƏRİMOV

(02.02.1996.-28.10.2020.)

Kürdəmir rayonunun Atakişili kəndindən  olan, Azərbaycan Ordusu Xüsusi Təyinatlı Qüvvələrin əsgəri,  Qarabağ uğrunda Vətən müharibəsinin şəhidi

XÜSUSİ  TƏYİNATLI   ZAUR

Hələ kiçik yaşından qorxmazdı, qoçaq idi,

Hamı onu sevirdi, ağıllı uşaq idi,

Sözü bütöv, sözü düz, hiylədən uzaq idi,

Böyüyüb yaşa doldu, qazandı neçə uğur,

Xüsususi təyinatlı, snayper, cəsur Zaur.

Vaxt yetişdi, Vətənə əsgər borcunun  vaxtı,

Fəxr edirdi, gətirib, onun taleyi, baxtı,

Əsgərlik bir məktəbdir,  həm şərəf, həm sınaqdı,

Xidmət edən zamanı duydu  bir sevinc, qürur,

Xüsususi təyinatlı, snayper, cəsur Zaur.

Qurtarıb xidmətini  qayıtdı doğma elə,

Çox düşündü qəlbində: “Rahat olmaram, hələ,

Həsrət qalmışıqsa biz əgər Xarıbülbülə,

Rahat yaşamaq olmaz, bu nə fərəh, bu nə şur?”,

Xüsususi təyinatlı, snayper, cəsur Zaur.

Yenidən o yazıldı  ordumuza xidmətə,

Yaxınlar  “Əhsən!” dedi  ondakı bu qeyrətə,

Kəşfiyyatçı igidlər layiqdirlər hörmətə,

Üz-gözündən yağırdı sanki işıq, sanki nur,

Xüsususi təyinatlı, snayper, cəsur Zaur.

Anlayırdı güc ilə məhv edərlər yamanı,

Səylə xidmət edirdi, çox sevirdi, idmanı,

Yarışlarda qazandı çoxlu “Fəxri fərman”ı

İgid güclü olanda damarda qanı coşur,

Xüsususi təyinatlı, snayper, cəsur Zaur.

Başlarkən müharibə, dedi,-bizimdir zəfər,

Hər bir əsgər- qəhrəman göstərəcəkdir hünər,

Haqq qalib gələcəkdir, məğlub olacaqdır şər,

Budur, igidlərimiz düşmən üstünə cumur,

Xüsususi təyinatlı, snayper, cəsur Zaur.

Döyüşdü Cəbrayılda, Hadrutda, Zəngilanda,

Neçə-neçə düşməni məhv etdi  bircə anda,

Qubadlıda, döyüşdə keçsə də şirin candan,

Sübut etdi, el-oba, Vətən sevgisi budur,

Xüsususi təyinatlı, snayper, cəsur Zaur.

Hər zaman ləyaqətli, hər vaxt üzüağ oldu,

Düşmən kürəyinə ox, ürəyinə dağ oldu,

Ölməzliyə qovuşdu, sönməz bir çıraq oldu,

Qurbansız,  şəhidlərsiz torpaqlar azad olmur,

Xüsususi təyinatlı, snayper, cəsur Zaur

“Ədəbiyyat və incəsənət”

(29.04.2024)