“Ədəbiyyat və incəsənət” portalı Azərbaycan Yazıçılar Birliyinin üzvü Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Zahir Mehdiyevə həsr edilmiş şeirlə tanış olacaqsınız.

ZAHİR ZAKİR OĞLU MEHDİYEV

(27.04.1988.-03.11.2020.)

Kürdəmir rayonunun Qarabucaq kəndindən olan, Azərbaycan Ordusunun giziri, Qarabağ uğrunda Vətən müharibəsinin şəhidi 

HÜNƏRİN DİLLƏRDƏ GƏZİR

 Hünərin dillərdə gəzir,

Mərd komandir, igid gizir,

El-obamız fəxr eyləyir,

Səntək oğul ilə,  Zahir.

Doğulduğun Qarabucaq,

Yetirib nə qədər qoçaq,

Doğma, müqəddəs ocaqda

Yenə mərdlər doğulacaq.

Vətən üçün keçdin candan,

Dedin  kişi qorxmaz qandan,

Elə həyat yaşadın ki,

Bunu başa düşməz nadan.

Əsgərlərlə qardaş idin,

Hər birinə sirdaş idin.

Komandirlik öz yerində,

Arxa-dayaq, yoldaş idin.

Xidmət etdin ləyaqətlə,

Bu vətənə sədaqətlə,

Xocavənddə döyüşdün sən.

Son anadək  sücaətlə.

Azaddır torpaqlarımız,

Başlayıb xoş çağlarımız.

Zahir kimi igidləri

Salamlayır dağlarımız.

Qurtarmaz sözün-söhbətin,

Qəhrəmanısan millətin.

Səninlə fəxr eyləyəcək

Aysu, Samir əmanətin.

“Ədəbiyyat və incəsənət”

(26.04.2024)