Gülnarə Camaləddin, “Ədəbiyyat və incəsənət” üçün

Bilmirəm bu təsadüfdürmü, yoxsa alın yazısı. O məhz bu gün - Ana dili günündə dünyaya gəldi. Ana dilinin bütün gözəlliklərini iliyinəcən duydu. Azərbaycan ədəbiyyatının söz yaddaşına SÖZ ustası kimi hopdu.

Sözləri cilaladı, nizama saldı. Bəlkə də ayrı planlar qururdu, alayı şeylər düşünürdü, amma Tanrı onun üçün alayı plan qurdu. Onu sözə bənd elədi. Yəhya Kamalın təbirincə desək, tarix hər vaxt öz hökmünü icra edir, vəssalam. O da tarixin övladıydı, alnına yazılanları, baxtına düşənləri yaşayırdı, yaşamağa məhkumdu... Çünki biz hamımız ömrün sürgünündə azadə məhbuslarıq.

Söhbət gözəl şair, ruh adamı, bu dünyanın cikini- bikini ovcunun içi kimi bilsə də:

Bizə düz görünür ən ağ yalan da,

Bir az cəhd eləyən aldadır bizi.

Siz niyə gülürsüz biz ağlayanda,

Sizi güldürənlər ağladır bizi.

Deyərkən bəlkə də, həyata, dünyaya, gözünün içinə baxa - baxa onu aldatmağa cəhd edənlərə qarşı bir şairanə üsyan edirdi. Amma Məmməd İlqar gerçək bir şair ömrü yaşayır... Sözə, qələmə xəyanət etmədən... Bu gün onun günüdür. Günü mübarək! Ömrü uzun, canı sağ olsun həmişə!

“Ədəbiyyat və incəsənət”

(21.02.2024)