“Ədəbiyyat və incəsənət” portalı Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Qoşqar Ömərova həsr edilmiş şeirlə tanış olacaqsınız.
QOŞQAR SƏXAVƏT OĞLU ÖMƏROV
(09.02.1994.-04.11.2020.)
Kürdəmirin Şilyan (Qarasu) kəndindən olan, Masazır kənd 5 nömrəli orta məktəbin riyaziyyat müəllimi, APU-nun və AzMİU-nun məzunu, Qarabağın azad edilməsi uğrunda Vətən müharibəsinin şəhidi.
QOŞQARDAN ƏLA DƏRS
Vətənin nə qədər igidləri var,
Bunlardan biridir nur üzlü Qoşqar.
İstəyirəm onun haqda danışım,
Olmasa da nə dostum, nə tanışım.
İndi doğmadan da əzizdir mənə,
Canın fəda edib ana Vətənə.
Doğulsa da Kürdəmir Şilyanında,
Sevilir yurdumun o, hər yanında,
Uşaqlıqdan dəqiq, ləyaqətliydi,
Ağıllı, çalışqan, fərasətliydi,
Məktəbdə əlaydı onun qiyməti,
Kəndlərində vardı xətir-hörməti.
Atası Səxavət müəllim kimi,
Sevirdi təhsili, sevirdi elmi.
Oxuyub məktəbi, “beş”lə bitirdi,
Ali məktəbə də uğurla girdi.
Elmə olan tükənməyən marağı
Asan etdi ona neçə sınağı.
Oxuyub qurtardı ali məktəbi,
Ürəyində vardı yenə mətləbi.
Magistr diplomu alması üçün,
Daha səviyyəli olması üçün,
Çalışdı, gecəni gündüzə qatdı,
Nəhayət, bu ülvi arzuya çatdı.
Vaxt gəldi, yollandı hərbi xidmətə,
Əsgəri borcunu verdi dövlətə.
Qayıtdı xidmətdən, verdi imtahan,
Müəllim olmaqçın- bilindi məkan.
Həyat çarpışmaqdır, həyat yarışdı,
Masazırda müəllim tək çalışdı.
Qoşqar çox saf idi, çox təmiz idi,
Məktəbdə hamıya dost, əziz idi.
Torpaq düşməndəydi, dözə bilmirdi,
Ürəkdən danışıb gülə bilmirdi.
Nəhayət, gün gəldi, çağırdı vətən.
Sevindi: - Bu günü gözləyirəm mən.
Yollandı döyüşə bir aslan kimi,
Vuruşdu hünərlə, qəhrəman kimi.
Kəşfiyyatçı oldu, mərdlik göstərdi,
Yağını məhv etdi, heçə döndərdi.
Qoşqar dağ adıdır- yüksəklik, zirvə,
Əsgər dostlarıyla aldı çox zirvə.
Göstərdi şücaət, göstərdi mərdlik,
Taleyində varmış onun şəhidlik.
Doğma el-obanın yurdun igidi,
Qazandı ölməz ad-vətən şəhidi.
Qoşqar, sən, əbədi yaşayacaqsan,
Zirvəsən, adını saxlayacaqsan.
Atana deyirəm:-Əziz Səxavət,
Övladın yurduma gətirdi şöhrət.
O, köçdü cənnətə, göyə ucaldı,
Gənc nəsil Qoşqardan əla dərs aldı.
Düşməndən alınıb doğma torpağım,
Sevin, Qarabağım, gül, Qarabağım.
“Ədəbiyyat və incəsənət”
(15.02.2024)
