“Ədəbiyyat və incəsənət” portalının Bir şeir - bir roman rubrikasında bu gün Əlizadə Nuridir. O, “Bir sevda qoynunda dərya salmışıq...” şeirində “Sənin haqqın verilməyib" deyən istedadlı qələm dostları  Ağaevli Əli Hacıya və Əlabbas Bağırova xitabən yazır: 

Bu dünya evinin künc-bucağında,

Bir az özümüzə yer saxlamışıq.

Bəlkə xatirələr "qara qutu" du-

İçində nə qədər sirr saxlamışıq...

Günəşin gözündən dağılır işıq...

Bu könül ev kimi... sevgi-sarmaşıq.

Bir sevda qoynunda dərya salmışıq,

Dəryanın dibində dürr saxlamışıq...

Bu göl darıxıbmış sonası üçün,

Yaz gəlib lalənin xınası üçün...

 Bütün balıqların xilası üçün,

Sudan hördüyümüz tor saxlamışıq... 

Min yaşı olsa da, körpədi dünya,

Hamını öldürdü, ölmədi dünya.

Bizim haqqımızı görmədi dünya-

Niyə bu dünyanı kor saxlamışıq?!..

“Ədəbiyyat və incəsənət”

(15.02.2024)