“Ədəbiyyat və incəsənət” portalı Coşqun Xəliloğlunun “Şəhidlər barədə şeirlər” silsiləsini təqdim edir. Bu gün İlqar Əhmədova həsr edilmiş şeirlə tanış olacaqsınız.

İLQAR XƏQANİ OĞLU ƏHMƏDOV

(18.03.1999.-20.11.2020.)

Kürdəmir rayonunun İsmayıllı kəndindən olan Qarabağ uğrunda Vətən müharibəsinin şəhidi

 İLQAR

Sən, Vətənin övladı, Vətən də sənə ana,

Canını qurban etdin doğma Azərbaycana!

Adın kimi özün də düz sözlü, ilqarlıydın,

Tanıyanlar bilirdi, qoçaqdın, vüqarlıydın.

Əsgərlik borcunu sən vermişdin ləyaqətlə,

Haqq uğrunda döyüşə atıldın cəsarətlə.

Aldın dostların ilə neçə şəhəri, kəndi,

Azad eyləyən zaman o gözəl Xocavəndi.

Vuruşdun hünər ilə, vuruşdun qeyrət ilə,

Döyüşdün düşmənlərlə, misilsiz cürət ilə.

Doğulduğun obadan getmişdin igid kimi,

İsmayıllıya döndün, ölməz bir şəhid kimi.

Günəşin zərrəsi tək nur saçaraq torpağa.

Büküldün üçrəngli, o müqəddəs bayrağa.

Zirvədə olanların şərəflidir adları,

Xalqım heç vaxt unutmaz İlqar tək övladları.

44 günlük döyüşdə ölməz tarix yazıldı,

Düşmənlərə biryolluq dərin qəbir qazıldı.

Torpağımız azaddır, gül açıbdır arzular,

Həmişə yaşayacaq xatirələrdə İlqar.

“Ədəbiyyat və incəsənət”

(08.02.2024)