“Ədəbiyyat və incəsənət” portalı Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Hakim Bəşirov həsr edilmiş şeirlə tanış olacaqsınız.

HAKİM NİZAM OĞLU BƏŞİROV

(02.0.1989.-20.10.2020.)

İmişli rayonunun Əlyetməzli kəndindən olan, SOCAR-ın ”Kompleksqazmaişləri” trestinin əməkdaşı Nizam Bəşirovun oğlu,  Azərbaycan Silahlı Qüvvələrinin leytenantı, Qarabağın azad edilməsi uğrunda Vətən müharibəsinin şəhidi

LEYTENANT   HAKİM

Arzuları ürəyində nə qədər,

Xəyalları çiçək kimi təzə-tər,

Mələk xeyir, şeytan elə şərdi, şər,

Şeytanı məh vedən,  bilək, kimdir, kim?

-Qorxmaz, mərd, qəhrəman leytenant Hakim.

Uşaqlıqdan dürüst, çalışqan idi,

Zəhmətə, əməyə alışan idi,

Vaxtilə, zamanla yarışan idi,

Deyirdi, çiynimdə var ağır yüküm,

Qorxmaz, mərd, qəhrəman leytenant  Hakim.

Ailədə var idi  nizam-intizam,

Atasın tanıyaq, neftçidir Nizam,

“Qarabağ qayıdar” – qəlblərdə inam,

Burada əbədi olmuşuq sakin,

Qorxmaz, mərd, qəhrəman leytenant Hakim.

Xeyirxahlıq onun xisləti idi,

“Vətən azad olsun”, niyyəti idi,

Tutduğu halal yol sərvəti idi,

Düşmənə qəlbində vardı nifrət,  kin,

Qorxmaz, mərd, qəhrəman leytenant Hakim.

Vaxt gəldi, düşmənə cavabın vaxtı,

Yağı qovulmalı, savabın vaxtı,

İldırım oynadı, şimşəklər çaxdı,

Odlu silahlarla verilir höküm,

Qorxmaz, mərd, qəhrəman leytenant Hakim.      

Hakim də döyüşdə bir şirə döndü,

Bax, budur, düşmənin ocağı söndü,

Yurdu övladına baxıb öyündü,

Düşündü, başına bəlkə, əl çəkim?

Qorxmaz, mərd, qəhrəman leytenant Hakim.

El-oba ayırır, yaxşı-yamanı

Qubadlı uğrunda döyüş zamanı,

Cənnətə qovuşan o qəhrəmanı,

Tanıdıq, qırıldı qəlbimdə bir sim,

Qorxmaz, mərd, qəhrəman leytenant Hakim.

Ucaldı zirvəyə rəşadətiylə,

Sevildi Vətənə sədaqətiylə,

İki övladıyla, əmanətiylə

Yaşayır əbədi, -yazdı qələmim,

Qorxmaz, mərd, qəhrəman leytenant Hakim.

 “Ədəbiyyat və incəsənət”

(01.02.2024)