Poetik Qiraətdə bu gün sizlərlə yenidən Cəıilabadda yaşayıb yaradan ustad şairimiz Əlizadə Nurinin şeirini təqdim edirik. “Şikəstə” adlanan şeir sevgi şeiridir, ayrılıqdandır. 

Şikəstə

Bəlkə bir yol göndərim-

Bəlkə durub gələsən?

Bu kədəri üstümə 

Kim göndərib görəsən?

Yaman imiş ayrılıq,

Nə yaman sənsizlədim.

Hara alıb apardın 

Bu dünyanı gizlədin?!

İndi döyüşmək gərək-

Gəlir bu qəm alayı...

Bir az öz səsiməm mən,

Bir az durna harayı...

Deyirdin yaz gələcək,

Bəs haçanmış, haçanmış?

Axşam çıxıb getmisən-

Ömür axşamacanmış...

...O yandan sərin gəlir-

Bəlkə sən son baharsan?

Silmişəm gözlərimi-

Gələndə daranarsan...

“Ədəbiyyat və incəsənət”

(29.01.2024)