“Ədəbiyyat və incəsənət” portalı Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Feyruz Tarverdiyevə həsr edilmiş şeirlə tanış olacaqsınız.

 FEYRUZ İSLAM OĞLU TARVERDİYEV

(22.07.1996-03.11.2020)

Kürdəmir rayonunun Sığırlı kəndindən olan, Azərbaycan Silahlı Qüvvələrinin əsgəri, Qarabağ uğrunda Vətən müharibəsinin şəhidi

ANAM, NƏ OLAR, AĞLAMA

Şəhidimizin, anası Məhbubə xanıma  demək istədiyi sözlər:                                         

-Torpaqlarımız alındı,

Anam, nə olar, ağlama.

Zəfər himnimiz çalındı,

Anam, nə olar, ağlama.

Mənə çəkdin çox əziyyət,

Başa saldın nədir qeyrət,

Anaya, yurda məhəbbət,

Anam, nə olar, ağlama.

Kiçikdim, balacan idim,

Sənin əziz balan idim,

Arxan idim, qalan idim,

Anam, nə olar, ağlama.

Nə saralıb, nə solmuşam,

Nə kövrəlib, nə dolmuşam,

Adına layiq olmuşam,

Anam, nə olar, ağlama.

Sığırlı doğma kəndimdir,

Qarabağ da Vətənimdir,

Cənnət mənim məskənimdir,

Anam, nə olar, ağlama.

Nifrəti biz ox eylədik,

Düşmənləri yox eylədik,

Üzünüzü ağ eylədik,

Anam, nə olar, ağlama.

Alovda, odda bişmişəm,

Min çətinliyə düşmüşəm,

Kişi kimi döyüşmüşəm,

Anam, nə olar, ağlama.

Azaddır Qarabağımız,

Üzə gülür torpağımız,

Dalğalanır bayrağımız,

Anam, nə olar, ağlama.

Feyruz kimi övladın var,

“Şəhid anası” adın var,

Şəhid ölməz, hər vaxt yaşar,

Anam, nə olar, ağlama.

Canım, nə olar, ağlama.

“Ədəbiyyat və incəsənət”

(26.01.2024)