Poetik Qiraətdə bu gün sizlərə şair Yusif Nəğməkarın yeni şeirini təqdim edirik. Bu soyuq qış günlərində şair əbədi sevgi mövzusuna müraciət edir. Hədər yerə deyilməyib ki, sevgi hərarətləndirir! 

NEYLƏDİN?!

Neylədin saçının ətrini, gülüm?

Göndər, əsən yellər yetirsin mənə.

Əhvalın necədir-mən hardan bilim?!

Sən ki xətri əziz xətirsən mənə!...

Neylədin əlini isidən əli?!.

Əl-ələ çağları çatdır əlimə.

Ələndi başıma həsrətin "ləl"i...

Ayrılıq zülümdür, nə var ölümə?!.

Sənsiz itirdiyim itgim də çoxdur...

Mənsiz köhlənsizim-atsızım sənsən...

Daha "Adsız" adda şeirim yoxdur,

Amma yazılası adsızım sənsən...

Neylədin, necoldu gülüşlərimiz?..

Qoşa şəklimizin düşəri hanı?!.

Bəxtəvər olmişduq dağda, düzdə biz...

Qəlbə həkk edərdik hər ötən anı...

Doymadım ilahi işvələrindən...

Neylədin o nazı, o ədanı bəs?!

Müqəddəs bilərdin o sevgini sən;

Deyərdin qalan şey əbəsdir, əbəs!..

Gəz, dolaş xatirə küçələrini,

Gəl, ayaq izini yarama sürtüm...

Göndər mənsiz keçən gecələrini,

Yuxusuzluğumun üstünə örtüm...

Qoruyaq ülfətin zərif yerini,

Yersiz inadımız gəlsin imana...

Birgə könlümüzün nəğmələrini

Verək bulaqlara aranjimana.

Xəyalım cəm olur bircəm önündə,

Qəlbindən kənarda necə təklənim?!.

Hardadır atəşin bu qış günündə?!.

Ömrümə bahartək gəl, çiçəklənim!..

“Ədəbiyyat və incəsənət”

(22.01.2024)