Poetik Qiraətdə bu gün sizlərə Rusiyada yaşayıb yaradan şairimiz Yaşar Süleymanlının şeirini təqdim edirik.
"Oldun" adlı bu şeirimi həm də dəyərli şairimiz, Rusiya yazıçılar birliyinin üzvü Afaq Şıxlı rus dilinə tərcümə edib, Rusiya oxucularına əlçatan edib.
OLDUN
Bir gülsən mənimçün heç vaxt solmayan,
Sən könül bağımın sonası oldun.
Mənim övladıma ana olmayan!
Gör, neçə şerimin anası oldun.
Qara günlərinmi saçındakı dən?
Yanında başqası, ürəyində mən,
Özgə ocağının kənarında sən,
Bir ömür üşüyüb, donası oldun.
Gözlədik vüsalı hey boyun büküb,
Ömürdən ayları, illəri söküb,
Gecələr sübhədək göz yaşı töküb,
Eləcə həsrətlə yanası oldun.
Çıxmadıq taleyin biz sınağından,
Yan keçdik qismətin düz qırağından,
Utandın, çəkindin el qınağından,
Sevsən də eşqini danası oldun.
Bir gülsən mənimçün heç vaxt solmayan,
Sən könül bağımın sonası oldun.
Mənim övladıma ana olmayan!
Gör, neçə şerimin anası oldun.
“Ədəbiyyat və incəsənət”
(12.01.2024)
