Könül, “Ədəbiyyat və incəsənət”

Bu gün nəğməkar şair Baba Vəziroğlunun 70 illik yubileyi günüdür, mən də öz rubrikamda sizlərə şairin dillər əzbəri olan sevgi şeirlərindən birini təqdim edirəm.

Bilirəm  tək yanan mən olacağam 

Bu da son ayrılıq son dayanacaq

Qismətin əlindən biz hara qaçaq.

Günah kimdə oldu – bilmirəm ancaq

Bilirəm – tək yanan mən olacağam 

Bilmirəm – sevincdən ya qəmdən oldu,

Bilmirəm dumandan, ya çəndən oldu.

Bəlkə də ayrılıq, tək səndən oldu,

Bilirəm – tək yanan mən olacağam. 

Niyə ayrılırıq, hara gedirik,

Vurub qəlbimizə yara gedirik.

Bəlkə ikimiz də günah edirik,

Bilirəm – tək yanan mən olacağam. 

Bəlkə bir yuxuydu – oyanmalısan,

Bəlkə, geri dönüb dayanmalısan,

Cəhənnəm oduna sən yanmalısan

Bilirəm – tək yanan mən olacağam. 

Min günah elədin sən dönə-dönə,

Bağışladım səni, sınadım yenə.

Yenə də, yenə də sənin xətrinə.

Bilirəm – tək yanan mən olacağam.

“Ədəbiyyat və incəsənət”

(10.01.2024)