“Ədəbiyyat və incəsənət” portalı Sumqayıtda yaşayıb yaradan gənc şair Elvin İntiqamoğlunun yeni şeirlərini təqdim edir. 

HALALLIQ

Keçmişimlə hesablaşmaq vaxtıdı -

bu günəcən

heç kimi gözləmədiyim 

yad məkanda

gözləmədiyim anda

bir zamanlar

halıma ağlayanları,

gülənləri gözləyirəm...

Açıq qapının ağzında

gedənlərlə halallaşıb

tək-tək yola salıram,

gələnləri gözləyirəm...

Mən burdayam -

cəhənnəmlə cənnətin 

kəsişdiyi nöqtədə

sağ-salamat qalanları,

ölənləri gözləyirəm...

HAÇANSA...

Sağlam ol deyə-deyə

yaşatdın mənə həsrətin

tək səbirli illərini

Haçansa...

Uzaq qohumlar qədər

yaxın etmişdim sənə mən

qonşu bağın güllərini

Haçansa...

Bir toxunuş da bəsdi -

barmaq izindən tanıyar

əllərim yar əllərini

Haçansa...

Sən də xoşbəxt olarsan -

göyün mübarək əlləri

sığallayar tellərini

Haçansa...

QİYAMƏTDƏN ƏLAMƏT

Daş yağacaq başımıza:

Dünyanın yığdığı daşlar

ətəyindən düşəcək -

Gözündən düşməyənlər

ürəyindən düşəcək...

Od yağacaq başımıza:

Günahlar dönəcək külə,

yer yanacaq həmin gün -

Şeytan qır qazanından

bir qab alov çəkəcək

acından ölənlər üçün...

Qan yağacaq başımıza:

Şəhidlərlə mələklər

gözləri yaşlı-yaşlı

yaxamızdan tutacaq -

Şəhidlər qərənfilləri

əməl dəftərimizin

başdaşına atacaq...

“Ədəbiyyat və incəsənət”

(19.12.2023)