“Ədəbiyyat və incəsənət” portalı Nəsr saatında sizlərə gənc yazar Uraqan Abdullayevin “Görüldü” hekayəsini təqdim edir. 

İki nəfər - oğlan və qız kafedə oturmuşdular. Oğlan qızı bu kafedə ilk dəfə idi ki, görürdü. Qızdan xoşu gəlməyə başlamışdı. Stolun üstündəki çaydan bir qurtum içib qıza baxırdı. Hər dəfə baxdıqca qızın üstündəki paltarlar tez-tez dəyişir, hər dəyişdiyi paltarla oğlanın üz cizgiləri, əhval ruhiyyəsi daha da canlanırdı.

Oğlan bütün cəsarətini toplayıb sözə başladı:

— Salam, tanış ola bilərik?

Qız da oğlana baxdı. Qız bu dəfə oğlana baxdıqca oğlanın üzərindəki geyimlər daha dəyişməyə başladı. Nə qədər çox baxırdısa, üzərindəki geyimlər o qədər tez dəyişirdi. Sanki oğlanın başqa geyimi qalmamışdı. Beləcə oğlanın təkrar eyni geyimlərə düşdüyünü görən qızın başı üzərində iri hərflərlə yazıldı:

"Görüldü"

Artıq 3 dəqiqə keçmişdi, amma qızdan hələ də cavab yox idi.

Oğlan yenidən soruşdu:

—Niyə cavab vermirsiniz?

Təkrar qızın başının üzərində yazıldı. "Görüldü"

Amma 2 dəqiqə sonra qız cavab verdi. "Salam”

Bu dəfə isə oğlanın başının üzərində iri hərflərlə “görüldü" yazılmışdı.

Amma qızdan fərqli olaraq 1 dəqiqə keçməmiş oğlan cavab verdi:

—Geyimlərinizə baxdım. Çox bəyəndim. 

Amma niyəsə oğlanın dediyi söz qıza çatmadı. Oğlan eyni sözü təkrar etdi. Nə üçünsə oğlanın dediyi söz qıza çatmırdı. Oğlan bir neçə dəfə təkrar etsə də qız eyni geyim və üz cizgiləri dəyişməz olaraq qalırdı. Oğlan pəncərəyə doğru yaxınlaşdı.

Hava pis olduğundan pəncərənin qırağında 10 dəqiqə gözlədi. 10 dəqiqə sonra qız əsəbi halda cavab verdi.

-Nə olub e, eyni şeyi təkrar eləyib durursan?

Oğlanın başının üzərində "görüldü" yazılan kimi 1 dəqiqə keçməmiş oğlan cavab verdi:—Bağışlayın, xanım. Hava pis olduğuna görə dediyim sözlər sizə gəlib çatmırdı.

– Nə istəyirsiniz?

– Sizinlə tanış olmaq.

– Mən tanımadığım adamlarla tanış olmuram! 

Oğlanın başının üzərində “görüldü” yazılan kimi cavab yazmaq istəsə də qarşısındakı qız bir anın içində gözəgörünməz oldu. Oğlan nə qədər çalışdısa da qızı nə görə bildi, nə də ki, əlavə nəsə deyə bildi.

Elə bu zaman qapı döyüldü. Oğlan artıq qapının arxasında kimin olduğunu bilirdi. Kor peşman yaxınlaşıb qapını açdı. Oğlanın qabağında balaca bir uşaq əlindəki zərflə dayanıb ona baxırdı. Zərfi uzadaraq uşaq dedi:

– Bu bildiriş sizə çatacaq. 

Oğlan bildirişi götürən kimi açıb oxumağa başladı.

Bildirişdə yazılmışdı:

"Əziz istifadəçi. Gələn çox saylı şikayətlərə görə siz bir aylıq heç kəslə danışa bilməyəcəksiniz. Diqqətinizə görə çox sağolun.

Hörmətlə, sosial şəbəkə rəhbərliyi”

“Ədəbiyyat və incəsənət”

(03.10.2023)